Konstituzio txit sakratuari esku-sartze bat egite hutsa aurrerapauso kosmiko bat izango zelakoan egon gara. Tontoak gu! Aspaldi ari ziren behartzen konkista sozialen gerriak, anorexiaren sintomak ikusten ari ginen gizartearen premia unibertsalenen gerri-bueltan, eta atzo Konstituzioaren gerrikoa baliatu zuten gehiago estutzeko zerbitzu sozialon geroa.
Edukazioa inbertsio ezin hobea delako, aberatsek beren seme-alaben hezkuntza lehenesten dute; oso garbi dute beren osasun-aseguru pribatuak ere inbertsioak direla. Gurea, ordea, gastua da nonbait, eta, ezari-ezarian, gu ere hasita gaude gastua deitzen hezkuntzari edo osasunari, ezkerretik zein eskuinetik datorkigun letaniatxoaren eraginez:
Ondo portau, gutxi gastau eta bueltak amari!
Hezkuntza edo osasuna inbertsioak zirelakoan geunden gu, eta ez gastuak. Konkista sozialon galbide erabatekoaren lehen zirriñoa egin zioten atzo Konstituzioari.
Anjel Lertxundi Esnal