Joan den hilabetean 58 aietear gehiagok izena eman dute Lanbideko erroldetan. Guztira, 630 dira.
Udako lan kontratuek ekarritako datu onak atzean utzita, langabeziak hirugarren hilabetez jarraian gora egin du Hego Euskal Herrian. Gipuzkoa izan da, beste behin, egoerari eutsi dion bakarra. Zerbitzuen eta eraikuntzaren alorrak izandako bilakaerari esker, nagusiki, irailarekin alderatuta, %0,04 behera egin du. Ez da asko, baina zerbait da. Irailean hasitako bide jarraitu du ere langabeziak Donostian, kopurua hazi egin baita urrian. Enplegu Zerbitzu Publikoak –INEM ohiak– ezagutarazi berri dituen datuen arabera, guztira 9.734 donostiar erroldaturik daude Lanbideren bulegoetan. Hau da, hiriko biztanleria aktiboaren –lan egiteko prest dauden 16 urtetik gorako lagunek osatua– %10,2 ez dute lanik aurkitzen.
Hilabete batetik bestera okerrera egin duen moduan, 2010eko urriarekin alderatuta, egoerak ez du hobera egin: %2,56 hazi da. Bere horretan begiratuta, alde hori ez da oso handia; baina urteetan atzera eginez gero, joera kezkagarriaren jarraipena dela ikus daiteke. Iaz, langabeak 9.484 baziren, 2009ko urrian, 8.837 zenbatu zituzten erroldetan. 897 lagunen gehitzea, ordea, ez da ezer 12 hilabete lehenago izandakoarekin. Euskal Estatistika Erakunde Eustaten arabera 2008ko urrian, 6.636 ziren lan bila zebiltzan hiritarrak. Krisi ekonomikoaren astindua argi uzten du ordutik hona 3.098 donostiarrek lana galdu eta langabezia ia %47 hazi izanak.
Lan kontuei dagokienean, apirila izan da urteko hilabete txarrena. Zaila dirudi 2011 amaitzeko gelditzen diren bi hilabeteetan orduko 10.418 langabeak berriro zenbatzea, baina ikusteko dago zenbatera iristen den.
Nork Maitane Aldanondo 2011/11/14