(Argazkia: Lantxabe auzo elkartea)
Ekainaren hasieran amaitu zuten Aieteko bidegorri berriaren lehenengo zatia, eta Lantxabe auzo elkartea pozik agertu zen emaitzarekin, nahiz eta hainbat iradokizun ere egin zituen. Beste eskaera bat egin du oraingoan auzo elkarteak, izan ere, salatu dute Aiete pasealekuko zati batean, Jolastokitik Aieteko Jauregiaren sarreraino doanean, bidegorria estuegia dela.
Hain zuzen, azaldu dute txirrindulariek ezin dutela bidegorriaren zati hori behar bezala erabili, horren estua izanda, alboko sastrakekin topo egiten dutelako. Ondorioz, ia espaloitik sartuta joan behar dute, eta oinezkoen eta txirrindularien arteko elkarbizitza zailagoa da zati horretan. Horregatik, Borroto kaleko edukiontziekin egin zuen moduan, udalari euren eskariak entzuteko eskatu diote. Halaber azpimarratu dute bidegorriak txirrindularien eta oinezkoen arteko elkarbizitza asko hobetu duela beste zati batzuetan.
2020/08/12
Beñat Parra
Kontxako pasealekua obretan dago, eta espaloiaren zati bat itxi dute. Hori dela eta, Donostiako Udalak oinezkoentzako pasabidea bidegorrira eramatea erabaki duela kritikatu du Kalapie Hiriko Txirrindulari Elkarteak. “Bien bitartean, galtzadaren zirkulazioa bere horretan mantendu da”, gaineratu dute.
Une honetan, bizikletek eta oinezkoek bidegorria partekatzen dute, eta txirrindulariak bizikletatik jaistera behartu dituzte. “Neurri honek gatazka eta ondoeza eragiten ari da herritarren artean. Gainera, tarte horretan oinezkoen saturazioa handia izaten ari da”, azaldu du Kalapiek.
Udalari eskatu diote, horrelako kasuetan, aldaketak aztertzerakoan, txirrindularientzako eta oinezkoentzako pasabide seguru bat bermatzeko. “Hori da lehenetsi behar duen mugikortasuna, eta ez autoarena”. Motordun ibilgailuentzako norabide bat jartzea proposatu dute, lanek irauten duten bitartean. Hau da, lehen faseko obretan hainbat hilabetez egin zen moduan.